Athbhreithniú struchtúrtha ar reachtaíocht réamh-1922 is ea an Clár um Athchóiriú an Dlí Reachtúil. Mar chuid den aidhm atá ag an gCoimisiún an dlí a choinneáil inrochtana, tá sé mar aidhm leis an gclár a chinntiú go mbíonn leabhar reachtanna na hÉireann nua-aimseartha, cruinn agus inrochtana don phobal.
Nuair a rinneadh Saorstát d’Éirinn sa bhliain 1922, ba mar oidhreacht a fuair sí na mílte dlíthe a rinne Rialtas na Ríochta Aontaithe. Tá roinnt de na dlíthe sin i bhfeidhm go fóill sa lá atá inniu ann, cé gur féidir nach bhfuil siad iomchuí nó nach bhfuil aon fheidhm acu a thuilleadh.
Leis an gClár um Athchóiriú an Dlí Reachtúil, déantar athbhreithniú ar reachtaíocht réamh-1922 chun a chinneadh cé na dlíthe ba cheart a choimeád agus cé na dlíthe ba cheart a chúlghairm. Cinntíonn sé sin go mbíonn leabhar reachtanna na hÉireann nua-aimseartha, cruinn agus inrochtana don phobal.
Tar éis sraith Achtanna um Athchóiriú an Dlí Reachtúil (2005, 2007, 2009, 2012, 2015, 2016) lena bpléitear le hAchtanna Poiblí atá as feidhm, arb Achtanna réamh-Neamhspleáchais iad den chuid is mó, le hAchtanna Príobháideacha, Áitiúla agus Pearsanta a rinneadh suas go dtí an bhliain 1922, agus le reachtaíocht thánaisteach a rinneadh suas go dtí an bhliain 1820, ghabh an Coimisiún air féin athbhreithniú a dhéanamh ar an reachtaíocht thánaisteach a rinneadh ón mbliain 1821 go dtí an bhliain 1922.
Mar thoradh ar an athbhreithniú sin, tugadh isteach an tAcht um Athchóiriú an Dlí Reachtúil, 2025, rud a bhaineann leis an tréimhse 1821-1860. Tugadh an Bille isteach den chéad uair i Seanad Éireann i mí Dheireadh Fómhair 2024 agus shínigh an tUachtarán é ina dhlí an 25 Iúil 2025.
Tá na dlíthe sin ar fáil ar Ríomhleabhar Reachtanna na hÉireann ar líne.
Is é an Coimisiún um Athchóiriú an Dlí, le tacaíocht ó Oifig an Ard-Aighne, atá freagrach as an gclár. Tá an obair ar an gcuid eile den tréimhse 1861-1922 beagnach críochnaithe, agus cuirfear tús le comhairliúchán le ranna rialtais sa bhliain 2026.
Tá sé beartaithe againn Bille um Athchóiriú an Dlí Reachtúil a thabhairt isteach don tréimhse 1861-1922, lena gcúlghairfear an reachtaíocht thánaisteach atá as feidhm agus lena ndeimhneofar cén reachtaíocht atá i bhfeidhm go fóill. Beidh sa Bhille sceidil ina mionsonrófar na nithe atá á gcúlghairm agus na nithe atá á gcoimeád.
Is in dhá chéim a rachaimid i gcomhairle maidir leis an dréacht-Bhille uainn.
Rachaimid i gcomhairle le ranna, comhlachtaí agus gníomhaireachtaí Rialtais chun a dtuairimí a lorg maidir leis na píosaí sonracha reachtaíochta tánaistí ba cheart a chúlghairm nó a choimeád.
Tabharfaimid cuireadh do dhaoine den phobal tuairimí a chur isteach maidir leis na píosaí reachtaíochta a bhfuil sé beartaithe iad a chúlghairm nó a choimeád. Breithnítear an t-aiseolas ar fad a fhaightear agus sceidil deiridh an Bhille á n-ullmhú.
Tabharfaimid dréachtsceidil don chéad Bhille eile um Athchóiriú an Dlí Reachtúil chun críche agus oibreoimid i gcomhar le hOifig an Ard-Aighne chun an Bille deiridh a dhréachtú. Nuair a bheidh an obair sin críochnaithe, beidh an reachtaíocht choimeádta réamh-1922 ar fad ar fáil i Ríomhleabhar Reachtanna na hÉireann, rud ar stór cuimsitheach ar líne é de na dlíthe uile atá i bhfeidhm in Éirinn. Is í an chéad tréimhse eile a dtabharfar aghaidh uirthi sa Chlár um Athchóiriú an Dlí Reachtúil ná an reachtaíocht thánaisteach ón mbliain 1922 go dtí an bhliain 1950.