“Ba cheart do rialtais i ndomhan dinimiciúil a bhíonn ag athrú go mear a chinntiú go gcoinnítear na dlíthe faoi athbhreithniú leanúnach agus go n-athchóirítear iad go tráthrialta agus go córasach” - Declan Costello TD (Díospóireachtaí Dála ar an mBille fán gCoimisiún um Athchóiriú an Dlí, 1975)
Comhlacht reachtúil neamhspleách a bunaíodh faoin Acht fán gCoimisiún um Athchóiriú an Dlí, 1975, is ea an Coimisiún um Athchóiriú an Dlí. Is é an ról atá againn an dlí a choimeád faoi bhreithniú agus athchóirithe a mholadh chun a chinntiú go bhfuil sé soiléir, nua-aimseartha agus cóir. Áirítear na nithe seo a leanas le hathchóiriú an dlí:
Déanaimid taighde agus athbhreithniú ar dhlíthe, téimid i gcomhairle go forleathan, agus foilsímid tuarascálacha ina bhfuil moltaí le haghaidh athruithe. Treoraíonn na nithe seo a leanas ár gcuid oibre:
Is próiseas ionchuimsitheach é athchóiriú an dlí. Téimid i gcomhairle go forleathan trí pháipéir, trí sheimineáir agus trí aighneachtaí poiblí chun a chinntiú go mbíonn dearcthaí éagsúla mar bhonn lenár moltaí.
Rud eile atá i gceist le hobair an Choimisiúin is ea reachtaíocht a dhéanamh níos inrochtana don phobal. Táirgeann an Coimisiún roinnt táirgí a bhaineann le rochtain ar reachtaíocht.
Ní hé amháin go dtomhaistear ár dtionchar bunaithe ar na tuarascálacha a chuirimid le chéile, ach tomhaistear é freisin bunaithe ar an tionchar a bhíonn ag na tuarascálacha sin ar an reachtaíocht, áit a gcuirtear thart ar 70% dár moltaí chun feidhme.
Tá sé mar aidhm againn freisin oideachas a chur ar an bpobal agus ról a thabhairt dó, feabhas a chur ar rochtain ar reachtaíocht, agus trédhearcacht a chur chun cinn. Tuigimid an tábhacht a bhaineann leis an líon agus an raon geallsealbhóirí a dtéitear i gcomhairle leo maidir lenár gcuid oibre. Chomh maith leis sin, cabhraíonn infheictheacht trí chaidreamh breithiúnach, caidreamh acadúil agus caidreamh leis na meáin lenár gcuid oibre maidir le rannchuidiú leis na haidhmeanna atá againn gnéithe de dhlíthe na hÉireann a fhorbairt agus a athchóiriú chun a chinntiú go bhfuil siad cothromasach, nua-aimseartha, cóir agus éifeachtúil.
Is iad ár gCláir um Athchóiriú an Dlí an príomh-mhodh trína gcomhlíonaimid an sainordú reachtúil atá againn an dlí a choimeád faoi bhreithniú agus athchóirithe a mholadh. I gcás gach Cláir, ullmhaíonn an Coimisiún é, ceadaíonn an Rialtas é, agus leagtar é faoi bhráid Thithe an Oireachtais faoin Acht fán gCoimisiún um Athchóiriú an Dlí, 1975.
Chuireamar ceithre Chlár um Athchóiriú an Dlí i gcrích go dtí seo, agus táimid ag obair ar an gCúigiú Clár faoi láthair.
Ina theannta sin, d’fhoilsíomar páipéir chomhairliúcháin ar thopaicí amhail díspeagadh cúirte, cionta a bhaineann le riaradh an cheartais, agus feabhas a chur ar rochtain ar líne ar reachtaíocht.
Ceann de na príomhfhreagrachtaí atá ar an gCoimisiún is ea dea-rialachas a chinntiú ar fud na heagraíochta. Bunaíodh an Coimisiún um Athchóiriú an Dlí leis an Acht fán gCoimisiún um Athchóiriú an Dlí, 1975. Dá bhrí sin, is leis an dlí a fhoráiltear don sainordú atá againn.
Cloíonn an eagraíocht leis an gCód Cleachtais chun Comhlachtaí Stáit a Rialú agus, nuair a bhíonn straitéisí á ndearadh agus á bhforbairt aici, tugann sí aird ar fhorbairtí ar fud na státseirbhíse agus na seirbhíse poiblí, go háirithe Straitéis Athnuachana na Státseirbhíse 2030.
