Tionscadail Reatha

Is iad na Cláir um Athchóiriú an Dlí de chuid an Choimisiúin an príomhbhunús ar a gcomhlíonann an Coimisiún an sainordú reachtúil atá air an dlí a choimeád faoi bhreithniú d’fhonn é a athchóiriú. Tá cúig Chlár um Athchóiriú an Dlí seolta ag an gCoimisiún ó bunaíodh ar dtús é. Ní mór don dá Theach den Oireachtas agus don Rialtas gach clár a cheadú.

Tionscadail sa Choimisiún um Athchóiriú an Dlí

Tar éis dúinn tionscadal comhaontaithe a chur ar áireamh i gClár um Athchóiriú an Dlí, is gnách go mbeidh trí chéim i gceist leis an tionscadal. Ar dtús, déanfar raon feidhme an tionscadail a mheas chun tuiscint a ghnóthú ar raon feidhme agus díriú an tionscadail. Rachfar i mbun comhairliúcháin ansin, trína mbeifear in ann dul i gcomhairle le geallsealbhóirí iomchuí agus le páirtithe leasmhara chun tuilleadh faisnéise, léargas agus smaointe a fháil maidir le saincheisteanna an tionscadail. Is é an chéim dheiridh ná an Tuarascáil a scríobh agus a eisiúint, rud ina mbeidh moltaí maidir le hathchóiriú an dlí a bhaineann leis na saincheisteanna a sainaithníodh sa dá chéim roimhe.

An tEolaire Tionscadal Reatha

Le linn shamhradh na bliana 2023, breis agus ceithre bliana tar éis thús an Chúigiú Clár, rinne an Coimisiún, le toiliú ón Ard-Aighne, athbhreithniú ar na tionscadail a bhí fágtha ar an gClár sin agus ar an gCeathrú Clár.

Tháinig an Coimisiún ar an gconclúid go ndeachaigh teagmhais eile ó cheadú an Chúigiú Clár ar leith chun tosaigh ar roinnt de na tionscadail sin, agus d’aontaigh an tArd-Aighne leis an gconclúid sin. Dá réir sin, ní bheadh sé stuama a thuilleadh acmhainní an Choimisiúin a chaitheamh ar thuilleadh oibre a dhéanamh ar na réimsí sin.

Is iad seo a leanas na tionscadail atá le críochnú go fóill.

Ina theannta sin, i mí Iúil 2026 fuair an LRC iarratas ón Ard-Aighne chun a mheas an mbeadh sé indéanta reachtaíocht a achtú le haghaidh cion coiriúil nua i leith mí-iompair in oifig phoiblí. Rinneadh é seo i ndiaidh moladh chuige seo i dTuarascáil Deiridh Choimisiún Imscrúdaithe an Oirdheiscirt maidir leis an bhFreagra ar Ghearáin nó Líomhaintí maidir le Mí-Úsáid Ghnéasach Leanaí a rinneadh i gcoinne Billy Kenneally agus Nithe Gaolmhara. Tá sonraí an ábhair seo liostaithe thíos freisin.

Íospartaigh na Coireachta a Chúiteamh

Scrúdaítear sa tionscadal seo tograí le haghaidh athchóiriú a dhéanamh ar scéim na hÉireann le haghaidh íospartaigh na coireachta foréigní a chúiteamh.

Cistiú Dlíthíochta Tríú Páirtí

Breithnítear sa tionscadal seo cé acu ba cheart nó nár cheart na cionta stairiúla arb éard iad claonchothú agus campháirtíocht a choimeád nó a rialáil agus cé acu ba cheart nó nár cheart cistiú tríú páirtí a cheadú in Éirinn agus, dá mba cheart, conas ba cheart é a rialáil.<br>

Comhlachtaí Tugtha Breithiúnas nach Cúirteanna iad

Scrúdaítear sa tionscadal seo conas is féidir na nósanna imeachta agus na próisis éagsúla atá i bhfeidhm ag comhlachtaí tugtha breithiúnas na hÉireann nach cúirteanna iad a chuíchóiriú gan an tsolúbthacht a theastaíonn ó gach comhlacht chun na feidhmeanna uathúla tugtha breithiúnas atá aige a chomhlíonadh a chailleadh, mar aon le conas is féidir achomhairc ar aghaidh chun na cúirte a shimpliú.

Dliteanas Comhlachas Neamhchorpraithe

Athbhreithnítear sa tionscadal seo dliteanas sibhialta agus dliteanas coiriúil comhlachas neamhchorpraithe, amhail oird rialta agus clubanna spóirt, ag teacht sna sála ar phríomhbhreitheanna cúirte.

Gnéithe den Dlí Teaghlaigh (Aithint dhlíthiúil colscarthaí coigríche)

Athbhreithnítear sa tionscadal an bunús dlí le haghaidh colscarthaí coigríche agus saincheisteanna gaolmhara pósta a aithint, ag teacht sna sála ar bhreitheanna ón gCúirt Uachtarach.

Gnéithe den Dlí Talún agus Tíolactha (seilbh chodarsna)

Caitear sa tionscadal súil eile ar an dlí um sheilbh chodarsna, rud a eisiadh ón Acht um Athchóiriú an Dlí Talún agus Tíolactha, 2009.

Mí-iompar in Oifig Phoiblí

Ar iarratas ón Ard-Aighne, de bhun alt 4(2)(c) d'Acht an Choimisiúin um Athchóiriú an Dlí 1975, tá an LRC ag breithniú an mbeadh sé indéanta reachtaíocht a achtú le haghaidh cion coiriúil nua i leith mí-iompair in oifig phoiblí.

Comhairliúcháin Reatha

Níl aon chomhairliúcháin oscailte ar siúl ag an gCoimisiún faoi láthair.

Téigh chuig comhairliúcháin